કોચી:બાંગ્લાદેશ અને દુબઈમાં હળદરની માંગ વધવાના કારણે તેના ભાવમાં તીવ્ર વધારો થયો છે. સ્થાનિક બજારોમાં અઠવાડિયાઓ સુધી હળદરમાં મંદી હતી. બમ્પર પાક અને ઘટતી માંગ વચ્ચે ભાવમાં ઉતારચઢાવ આવ્યા હતા. છેલ્લા બે મહિનામાં જૂન ડિલિવરી માટે હળદરની ડિલિવરીના ભાવમાં 10 ટકા વધારો થયો છે. નેશનલ કોમોડિટી એક્સ્ચેન્જ એન્ડ ડેરિવેટિવ્ઝ એક્સ્ચેન્જ (એનસીડેક્સ) પર ભાવ ₹71.92 પ્રતિ કિલો બંધ આવ્યો હતો. સ્પોટ પ્રાઇસમાં વાર્ષિક ધોરણે 10થી 15 ટકાનો વધારો થયો છે અને અત્યારે આ મસાલો 78થી 82 રૂપિયા પ્રતિ કિલોના ભાવે ઉપલબ્ધ છે. હળદરના અગ્રણી નિકાસકાર એશિયન ફૂડ ઇન્ડસ્ટ્રીઝના પાર્ટનર અજય કે તાહિલિયાનીએ જણાવ્યું કે, “બાંગ્લાદેશે છેલ્લાં કેટલાંક સપ્તાહોમાં હળદરના ઉપાડમાં વધારો કર્યો છે. દુબઈથી ખાડીના અન્ય દેશોમાં હળદરની નિકાસ કરવામાં આવે છે.”

છેલ્લાં કેટલાંક વર્ષોથી બાંગ્લાદેશ ભારતીય હળદરનું મોટું આયાતકાર રહ્યું છે. જેના કારણે ભારતમાંથી હળદરની નિકાસનું વોલ્યુમ વધારવામાં મદદ મળી હતી. 2016’17માં ભારતે1.16 લાખ ટન હળદરની નિકાસ કરી હતી. જોકે, છેલ્લા નાણાકીય વર્ષમાં ઉત્પાદનમાં ઘટાડાથી ભારતમાંથી નિકાસને ફટકો લાગ્યો હતો. ડિસેમ્બર 2017માં પૂરા થયેલા નવ મહિનામાં હળદરના શિપમેન્ટમાં વાર્ષિક ધોરણે છ ટકાનો ઘટાડો થતા 80,440 ટનનું શિપમેન્ટ થયું હતું તેમ સ્પાઇસ બોર્ડના આંકડા દર્શાવે છે. આ ગાળામાં નિકાસનું મૂલ્ય 16 ટકા ઘટીને 778 કરોડ થયું હતું. પરંતુ હળદર ઉગાડનારા અને ટ્રેડર્સે કહ્યું કે તેમના માનવા પ્રમાણે ચાલુ વર્ષમાં ઉત્પાદન ઓછામાં ઓછું 10 ટકા વધુ હશે. જોકે, શરૂઆતમાં લગભગ એકસમાન ઉત્પાદનનો અંદાજ હતો. એન્જલ કોમોડિટી બ્રોકિંગના ફંડામેન્ટલ એનાલિસ્ટ રિતેશ કુમાર સાહુએ જણાવ્યું કે ખેતીવાડી બોર્ડના અંદાજ પ્રમાણે કુલ ઉત્પાદન 11.63 લાખ ટન હતું જે એક વર્ષ અગાઉ 10.56 લાખ ટન હતું. તેલંગણા, આંધ્રપ્રદેશ અને મહારાષ્ટ્રમાં સારો પાક ઊતર્યો છે. તામિલનાડુમાં અપેક્ષા કરતાં વધુ સારો પાક મળ્યો છે. તેમ ઇરોડ ટર્મેરિક મર્ચન્ટ એસોસિયેશનના પ્રેસિડન્ટ આર વી રવિશંકરે જણાવ્યું હતું. સામાન્ય રીતે મે મહિના પછી સ્થાનિક માંગ નરમ પડે છે અને ઓગસ્ટમાં તહેવારોની સીઝન સાથે માંગમાં વધારો થાય છે.

LEAVE A REPLY

Please enter your comment!
Please enter your name here