Desi Rose Cultivation

ભારતમાં ત્રણ સ્થળો પૈકી ગુજરાતના એકમાત્ર પાલીતાણા ખાતે દેશી ગુલાબની ખેતી થાય છે અને વ્યાપક પ્રમાણમાં ઉતારો ઉતરતા આ તાલુકામાં ગુલકંદ પણ વિશેષ ઉત્પાદન થાય છે જે ગરમીમાં ઠંડક આપવાનું કામ કરે છે. તીર્થનગરી પાલીતાણા જૈનોની અતિ પવિત્ર નગરી છે જ્યાં હજારો મંદિરમાં મૂર્તિ બિરાજમાન છે.

પાલીતાણા નો ગુલકંદ

સાથોસાથ પાલીતાણાનો ગુલકંદ ખુબ જ પ્રખ્યાત છે. ભારતમાં ફળદ્રુપ જમીન ઉપર ગુલાબની ખેતી થાય છે જેમા ત્રણ જગ્યાએ પુષ્કળ પ્રમાણમાં દેશી ગુલાબ (પીંક રોઝ)ની ખેતી થાય છે. જેમાં રાજસ્થાનનું પુષ્કર, કાનપુરની બાજુમાં આવેલ કનોઝ તથા ગુજરાતમાં આવેલ પાલીતાણા આ ત્રણ જગ્યા સિવાય દેશી ગુલાબની ખેતી થતી નથી. પાલીતાણાનો ગુલકંદ ત્રણ પૈકી અતિ ઉત્તમ હોવાનું જાણવા મળેલ છે.

પાલીતાણામાં ગુલાબની ૫૦ થી વધુ વાડી આવેલ છે. ત્રણ ઋતુમાં ગુલાબનો ઉતારો અલગ અલગ આવે છે. હાલ ઉનાળામાં બધી વાડીઓ ભેગી કરીએ તો અંદાજીત ૧૦૦ કિલોનો ઉતારો દરરોજનો આવે છે તેજ રીતે શિયાળામાં ૪૦૦ કિલો અને ચોમાસામાં દરરોજનો ૫૦૦થી ૭૦૦ કિલો જેટલો ઉતારો આવે છે અને ૧ કિલો ગુલાબમાં આશરે ૩૦૦ નંગ ઉતરે છે. ફક્ત દેશી ગુલાબમાંથી જ ગુલકંદ બને છે. પાલીતાણામાં ગુલકંદ બનાવનાર ત્રણથી ચાર વેપારી જ છે જે પોતાના ઘરે દેશી ગુલાબમાંથી પાંદડી છુટી પાડે છે ત્યારબાદ ખંડુલામાં ખાંડી નાખે છે અને મોટા તપેલામાં એક થર ગુલાબની પાંદડીનું એક થર ખાંડનું તે રીતે આખુ તપેલુ ભરે છે અને દરરોજ તડકામાં સળંગ ૨૫ દિવસ સુધી રાખે છે ત્યારબાદ ડબ્બામાં પેકીંગ કરી વેચવા મુકે છે અન્ય એક રીતે ચાસણીમાંથી બને છે પરંતુ તે ફક્ત ત્રણેક મહિના સુધી રહે છે ત્યાર બાદ બગડી જાય છે. જ્યારે ૨૫ દિવસ સુધી તડકે તપાવેલ ગુલકંદ બેથી ત્રણ વર્ષ સુધી બગડતો નથી તેમ વેપારીનું કહેવુ છે.

વર્ષ દહાડે પાલીતાણાનો ગુલકંદ અંદાજીત ૧૮ હજાર કિલોનું વેચાણ છે. ગુલકંદ ખુબજ ઠંડો હોવાથી શરીરની ગમે તેવી ગરમીમાં પણ ઠંડક આપે છે. એસીડીટી, તજા ગરમી, પગના તળીયાની બળતરા હોય, છાતીમાં બળતરામાં રાહત આપે છે. મગજની ગરમીને દૂર કરે છે. દુધ સાથે ગુલકંદ લેવાથી પરિણામ જલ્દી આવે છે. ગુલકંદ અલગ અલગ પ્રકારના બને છે. ઉનાળામાં ગુલકંદની માંગ વધતા પાલીતાણાના વેપારીઓ પુસ્કરથી પણ ગુલકંદ લાવે છે તેમ જાણવા મળેલ છે. પાલીતાણાનો ગુલકંદ ભારત સહિત વિદેશમાં વસતા ગુજરાતીઓ પણ મંગાવે છે. ગુલકંદનો આઇસ્ક્રીમ, મીઠાઇ સહિત વિવિધ વસ્તુઓમાં ઉપયોગ કરે છે.

LEAVE A REPLY

Please enter your comment!
Please enter your name here